ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាឲ្យបោះពុម្ពសៀវភៅ «សម្ដេចតេជោ ហ៊ុន សែន អ្នកគូសវាសជោគវាសនាកម្ពុជា» ចំនួន ៥ម៉ឺនច្បាប់ និងកំពុងចាត់ចែងឲ្យមានការបកប្រែជាភាសាអង់គ្លេសផងដែរដើម្បីឲ្យបរទេសបានដឹងពីរឿងសម្ងាត់របស់សម្ដេចតេជោដែលមិនត្រូវបានសាធារណជនបានដឹង។

សរសេរនៅលើ facebook page នៅថ្ងៃទី១៥ ខែកញ្ញានេះ សម្ដេចតេជោ ហ៊ុន សែន បានលើកឡើងថា «ដល់ពេលដែលត្រូវបញ្ចេញនូវរឿងរ៉ាវមួយចំនួនដែលមនុស្សភាគច្រើនមិនបានដឹង»។

សម្ដេចថា៖ «សៀវភៅនេះបានបញ្ចេញនូវរឿងសម្ងាត់ប្រម៉ាណ ៧០ ទៅ៨០ភាគរយដែលមនុស្សភាគច្រើនមិនបានដឹងដែលខ្ញុំយល់ថាចាំបាច់ត្រូវបញ្ចេញឱ្យដឹងនាពេលនេះ»។

សៀវភៅ «សម្ដេចតេជោ ហ៊ុន សែន អ្នកគូសវាសជោគវាសនាកម្ពុជា» បានសរសេរដោយប្រធានគណៈស្រាវជ្រាវប្រវត្តិសាស្រ្តគណបក្សប្រជាជននិងជារដ្ឋមន្ត្រីប្រតិភូអមនាយករដ្ឋមន្ត្រី លោក កែវ បាភ្នំ ដែលចំនួន ៦០១ទំព័រ៕